Heulwen

Introduction

Datblygwyd Prosiect Celfyddydau Uned Heulwen fel partneriaeth rhwng Pontio, BLAS ac Uned Heulwen, Ysbyty Gwynedd, gyda chefnogaeth Cyngor Celfyddydau Cymru. Cynhaliwyd y prosiect yn Uned Heulwen, sy’n darparu gwasanaethau arbenigol i blant a phobl ifanc, mewn ymateb i bryder ynghylch lefel uchel o apwyntiadau a fethwyd ac effaith gorbryder ar brofiad cleifion a theuluoedd. Trwy raglen o weithgareddau creadigol dan arweiniad artistiaid – gan gynnwys cerddoriaeth fyw, celf weledol, barddoniaeth a gweithgareddau synhwyraidd – nod y prosiect oedd lleihau pryder, gwella’r profiad o aros ac annog ymgysylltiad mwy cadarnhaol ag apwyntiadau a gweithdrefnau clinigol. Roedd y gwerthusiad yn dangos bod y dull wedi gwella profiad plant, teuluoedd a staff, wedi cynyddu hyder teuluoedd i ddychwelyd ar gyfer apwyntiadau, ac wedi darparu sylfaen gref ar gyfer asesu effaith hirdymor ar leihau apwyntiadau a fethir.

The Challenge

Datblygwyd y prosiect mewn ymateb i’r her o wneud ymweliadau ag Uned Heulwen yn llai brawychus i blant, pobl ifanc a’u teuluoedd. Roedd staff wedi nodi bod llawer o blant yn cyrraedd mewn cyflwr o orbryder cyn profion gwaed, gweithdrefnau diagnostig ac apwyntiadau arbenigol, gyda’r profiadau hyn yn gallu arwain at ofn dychwelyd a chyfrannu at nifer uchel o apwyntiadau a fethwyd. Roedd amseroedd aros hir ac amgylchedd clinigol anghyfarwydd yn ychwanegu at y straen i deuluoedd a staff. Nod y prosiect oedd defnyddio creadigrwydd i drawsnewid profiad yr ystafell aros, lleihau pryder, cefnogi lles emosiynol ac annog ymgysylltiad mwy cadarnhaol â gwasanaethau iechyd. Er nad oes digon o ddata eto i gadarnhau gostyngiad mewn apwyntiadau a fethir, dangosodd y gwerthusiad gynnydd sylweddol yn hyder teuluoedd i ddychwelyd ac effaith gadarnhaol ar brofiad y gwasanaeth.

The Approach

Cyflwynwyd Prosiect Celfyddydau Uned Heulwen fel partneriaeth rhwng Pontio, BLAS ac Uned Heulwen, Ysbyty Gwynedd, gyda chefnogaeth Cyngor Celfyddydau Cymru. Roedd y prosiect yn integreiddio artistiaid ac ymarferwyr creadigol i amgylchedd yr uned, gan gyflwyno rhaglen hyblyg o weithgareddau creadigol yn yr ystafell aros a mannau cysylltiedig. Roedd y gweithgareddau’n cynnwys cerddoriaeth fyw, celf weledol, barddoniaeth, gweithgareddau rhyngweithiol ac elfennau synhwyraidd, wedi’u cynllunio i ymateb i anghenion unigol pob plentyn yn hytrach na dilyn rhaglen sefydlog. Gweithiodd yr artistiaid mewn partneriaeth agos â staff clinigol, gan addasu eu dull yn ôl llif yr uned a lefelau pryder y plant. Wrth i’r prosiect ddatblygu, daeth y gweithgareddau’n rhan naturiol o brofiad yr ymweliad, gyda staff yn defnyddio creadigrwydd i helpu plant cyn, yn ystod ac ar ôl gweithdrefnau megis profion gwaed a sganiau. Roedd y gweithgareddau hefyd yn galluogi rhieni i gael sgyrsiau pwysig gyda staff tra oedd eu plentyn yn ymgysylltu mewn amgylchedd diogel a chefnogol. Roedd y dull yn seiliedig ar egwyddorion gwaith plentyn-ganolog, gan ganiatáu i blant gymryd rhan ar eu cyflymder eu hunain ac adeiladu ymddiriedaeth yn raddol. Drwy greu amgylchedd mwy croesawgar a llai clinigol, roedd y prosiect yn cefnogi lles emosiynol plant, teuluoedd a staff, gan gyfrannu at brofiad mwy cadarnhaol o wasanaethau iechyd ac adeiladu hyder i ddychwelyd ar gyfer apwyntiadau yn y dyfodol.

The Impact

Arweiniwyd y gwerthusiad gan Cwmni Celyn gan ddefnyddio dull cymysg i gyfuno data meintiol ac ansoddol. Casglwyd tystiolaeth drwy 182 holiadur gan blant, pobl ifanc, rhieni a gofalwyr, 30 arsylwad strwythuredig gan fyfyrwyr a staff, a chyfweliadau gyda staff Uned Heulwen, artistiaid ac ymarferwyr creadigol. Casglwyd hefyd astudiaethau achos i ddangos effaith y prosiect ar unigolion. Roedd y dull hwn yn galluogi dealltwriaeth fanwl o brofiadau defnyddwyr y gwasanaeth a'r effaith ar yr amgylchedd clinigol. Dangosodd y gwerthusiad effaith gadarnhaol iawn. Nododd 97.8% o ymatebwyr fod y gweithgareddau creadigol wedi gwella eu hymweliad ac wedi helpu plant i deimlo’n fwy tawel a hapus wrth aros. Dywedodd 96.7% fod yr ystafell aros yn teimlo’n fwy cyfeillgar ac ymlaciol, tra bod 97.3% yn teimlo’n fwy hyderus ynghylch dychwelyd am apwyntiadau yn y dyfodol. Roedd yr arsylwadau hefyd yn dangos llai o orbryder, mwy o ymgysylltu a gwell cyfathrebu rhwng plant, teuluoedd a staff. Yn ogystal â chyflawni’r nod o wella profiad a lles emosiynol plant a theuluoedd, datgelodd y prosiect ganlyniadau anfwriadol pwysig. Daeth artistiaid yn rhan o lif gwaith clinigol yr uned, gan gefnogi gweithdrefnau fel profion gwaed a sganiau drwy ddefnyddio creadigrwydd i dawelu a thynnu sylw plant. Nodwyd hefyd effaith gadarnhaol ar les staff ac awyrgylch yr uned. Er nad oedd digon o ddata eto i gadarnhau gostyngiad mewn apwyntiadau a fethir, dangosodd y canlyniadau fod teuluoedd yn fwy hyderus i ddychwelyd ac awgrymodd y dystiolaeth botensial cryf ar gyfer effaith hirdymor.

Lessons Learned

Dangosodd y prosiect fod angen amser i waith creadigol ddod yn rhan naturiol o wasanaeth iechyd. Wrth i ymddiriedaeth ddatblygu rhwng artistiaid a staff, daeth creadigrwydd yn rhan o’r llif gwaith clinigol ac roedd ei effaith yn cynyddu. Dysgwyd hefyd fod dull hyblyg, plentyn-ganolog a darpariaeth ddwyieithog yn hanfodol i ymgysylltu’n llwyddiannus. Pe bai’r prosiect yn cael ei ailgyflwyno, byddem yn cryfhau’r integreiddio â gwasanaethau clinigol o’r cychwyn cyntaf, yn casglu data meintiol dros gyfnod hirach i fesur effaith ar apwyntiadau a fethir, ac yn ehangu cyfleoedd i artistiaid rannu dysgu ac arfer da. Bydd y gwersi hyn yn llywio datblygiad y prosiect dros y ddwy flynedd nesaf ac yn cefnogi ei fabwysiadu mewn lleoliadau iechyd eraill.

The Legacy

Mae’r prosiect wedi dangos bod creadigrwydd yn gallu dod yn rhan werthfawr o ofal iechyd pediatrig, gan wella profiad plant, teuluoedd a staff. Mae cyllid bellach wedi’i sicrhau am ddwy flynedd arall, gan alluogi’r gwaith i barhau, cryfhau’r bartneriaeth rhwng Pontio, BLAS ac Uned Heulwen, a chasglu tystiolaeth hirdymor – gan gynnwys effaith bosibl ar leihau apwyntiadau a fethir. Bydd y prosiect yn parhau i ddatblygu integreiddio artistiaid o fewn gwasanaethau clinigol, ehangu’r amgylchedd creadigol a rhannu’r dysgu fel model y gellir ei fabwysiadu mewn lleoliadau iechyd eraill ledled Cymru.

Website and Social Media Links

www.pontio.co.uk https://www.instagram.com/blaspontio/ https://www.facebook.com/PontioBLAS/ Link i Astudieuthau Achos a gwaith Assesu Cwmni Celyn https://www.dropbox.com/scl/fo/z32nmwtozuwsfkvgo45ak/AIO60xlJfIfJoeiqaNcbugE?rlkey=m5im575mihq2pau58p4inax9v&st=9k8d8fql&dl=0

Contact Details

Mared Elliw Huws Cydlynydd Datblygu'r Celfyddydau, Pontio m.huws@bangor.ac.uk

• Knowledge Bank
  • Case Studies
  • Articles / Interviews
  • Audio / Video
  • Whitepapers / Research
  • Resource Packs / Kits
  • Tools
  • Evaluations / Reports
  • Other
  • All Resources